O‘zbekiston va Xalqaro valyuta jamg‘armasi: Makroiqtisodiy barqarorlik va strategik sheriklikning yangi bosqichi

O‘zbekiston Prezidenti Xalqaro valyuta jamg‘armasi bilan strategik sheriklikni kengaytirish muhimligini ta’kidladi

O‘zbekiston Respublikasi Prezidenti Shavkat Mirziyoyev 29-iyun kuni mamlakatimizga amaliy tashrif bilan kelgan Xalqaro valyuta jamg‘armasi (XVJ) boshqaruvchi direktorining o‘rinbosari Bo Lini qabul qildi. Mazkur oliy darajadagi uchrashuvda global moliya bozorlarining bugungi holati, rivojlanish tendensiyalari hamda O‘zbekiston va XVJ o‘rtasidagi ko‘p qirrali hamkorlikni yangi bosqichga olib chiqish istiqbollari atroflicha muhokama qilindi.

Muloqot avvalida nufuzli mehmon davlatimiz rahbariga Xalqaro valyuta jamg‘armasi boshqaruvchi direktori Kristalina Georgiyevaning samimiy salomi va eng ezgu tilaklarini yetkazdi. Bu o‘z navbatida, jamg‘armaning Yangi O‘zbekistonda amalga oshirilayotgan tarkibiy va institutsional islohotlarga bo‘lgan yuksak e’tirofi ifodasidir.

Uchrashuvda o‘tgan yilning sentabr oyida Nyu-York shahrida BMT Bosh Assambleyasi doirasida XVJ rahbariyati bilan erishilgan muhim kelishuvlar ijrosi ko‘rib chiqildi. Ta’kidlash joizki, bugungi kunda yurtimizda pul-kredit, valyuta va fiskal siyosatni takomillashtirish hamda makroiqtisodiy barqarorlikni ta’minlash borasidagi keng ko‘lamli yangilanishlarda ushbu xalqaro institutning o‘rni nihoyatda salmoqlidir.

Strategik sheriklik doirasida kelgusida makroiqtisodiy siyosat strategiyasini ishlab chiqish, raqamli to‘lovlar tizimini yanada rivojlantirish hamda kapital harakatini liberallashtirish jarayonlarini jadallashtirishga kelishib olindi. Shuningdek, milliy statistika metodologiyasini xalqaro andozalarga moslashtirish, davlat daromadlarini boshqarish tizimini takomillashtirish va moslashuvchan erkin valyuta ayirboshlash kursini qo‘llab-quvvatlash masalalarida jamg‘armaning ekspertlik va texnik ko‘magini yanada kengaytirish zarurligi qayd etildi.

Muzokaralarda mamlakatimiz iqtisodiy idoralari va vazirliklari uchun zamonaviy xalqaro talablarga javob beradigan kadrlar tayyorlash hamda mutaxassislar malakasini oshirish dasturlarini tizimli yo‘lga qo‘yish masalasiga alohida e’tibor qaratildi. Mazkur uchrashuv O‘zbekistonning global moliyaviy integratsiyalashuv yo‘lidagi navbatdagi dadil qadamlaridan biri bo‘ldi.