Bekobodda yangilanish shabodasi: Prezident Doʻstlik mahallasidagi bunyodkorlik ishlari bilan tanishdi

Bekobod shahri bugungi kunda Yangi Oʻzbekistonda kechayotgan islohotlarning yorqin namunasiga aylanib bormoqda. Prezident Shavkat Mirziyoyevning shaharga soʻnggi tashrifi davomida “Xos yoz” kanali boʻyi va Doʻstlik mahallasida amalga oshirilgan bunyodkorlik ishlari bilan tanishuvi bu oʻzgarishlarning koʻlamini yaqqol koʻrsatdi.

Bir paytlar eʼtibordan chetda qolgan, qarovsiz “Xos yoz” kanalining boʻyi endilikda shaharning eng goʻzal maskaniga aylandi. Hududni kompleks rivojlantirish master-rejasi doirasida 3 kilometr uzunlikdagi piyodalar yoʻlagi va 5,4 kilometrlik toʻsiqlar barpo etildi, ikkita koʻprik qad rostladi. Sohil boʻyida 27 ta yangi savdo va xizmat koʻrsatish obyekti tashkil etilib, 167 ta doimiy ish oʻrni yaratildi.

Doʻstlik mahallasi bugun 28 gektar hududni egallab, unda 33 ta koʻp qavatli uy, xususiy maktabgacha taʼlim tashkiloti, futbol maydoni, 16 ta sport va bolalar maydonchasi hamda kutubxona faoliyat yuritmoqda. Joriy yilda tadbirkorlar 1,1 milliard soʻm investitsiya kiritib, 10 ta xizmat koʻrsatish obyekti va umumiy ovqatlanish shoxobchasini ochdi, natijada 25 ta ish oʻrni tashkil etildi.

Tashabbuskorlar mablagʻi hisobidan harbiy texnika namunalari oʻrnatilgan “Vatanparvar bogʻi”, “Tashabbusli budjet” mablagʻlari hisobidan esa Bekobod shahri muzeyi barpo qilindi. Nuroniylar va mehnat faxriylari uchun yogʻoch konstruksiyali yozgi shiypon ham qurildi.

Davlatimiz rahbari mahalla faollari va mehnat faxriylari bilan samimiy muloqot chogʻida amalga oshirilayotgan barcha ishlar, avvalo, aholiga xizmat qilishi va insonlar hayotini yaxshilashi lozimligini taʼkidladi. Prezidentning taʼkidlashicha, har safar hududlarga kelinganda odamlar Yangi Oʻzbekiston islohotlarining nafasini his etishi zarur.

Shu tariqa Prezidentning Bekobodga safari yakuniga yetdi va davlatimiz rahbari Toshkentga qaytib keldi. Mahalladagi yangilanishlar mintaqada odamlar farovonligini oshirishga qaratilgan izchil siyosatning amaldagi natijasi boʻldi.