O‘zbekiston Prezidenti xalqaro kongress ishtirokchilariga murojaat qildi: Turkiy dunyo, jadidlar merosi va raqamli kelajak

O‘zbekiston Prezidenti xalqaro kongress qatnashchilariga murojaat yo‘lladi

TOSHKENT, 30-iyun. O‘zbekiston Respublikasi Prezidenti Shavkat Mirziyoyev Birinchi Turkologiya qurultoyining 100 yilligiga bag‘ishlangan xalqaro kongress qatnashchilariga rasmiy tabrik yo‘lladi. Davlat rahbari o'z qutlovida turkiy dunyoning qadimiy va boy tarixi, ilmiy va madaniy merosini o‘rganishdek muhim ishga hissa qo‘shayotgan olimlar va jamoat arboblarini qutladi.

     Murojaatda ta'kidlanishicha, 1926-yilda Boku shahrida o‘tkazilgan tarixiy qurultoy turkiy xalqlar taraqqiyotida muhim burilish yasagan. Unda Mahmudxo‘ja Behbudiy, Abdurauf Fitrat, Abdulla Avloniy kabi 11 nafar o‘zbek ziyolilari faol ishtirok etgani alohida yodga olindi. Ismoil G‘aspiralining “Tilda, fikrda, ishda birlik” g‘oyasi asosida birlashgan bu ma'rifatparvarlar murakkab davrda ta'lim va madaniyat rivojiga beqiyos hissa qo'shgan.

Zamonaviy chaqiriqlar: Sun'iy intellekt va raqamlashtirish

    Prezident o'z nutqida dunyo yangi taraqqiyot bosqichiga qadam qo‘yayotgan bugungi sharoitda turkologiya fani oldida turgan yangi dolzarb vazifalarni belgilab berdi. Xususan:

• Sun’iy intellekt imkoniyatlaridan keng foydalanish;

• Tarixiy qo‘lyozmalarni raqamlashtirish;

• Umumturkiy elektron lug‘atlar va til korpuslarini yaratish;

• Yosh tadqiqotchilarni qo‘llab-quvvatlash va akademik almashinuv dasturlarini kengaytirish zarurati ta'kidlandi.

Yangi xalqaro tashabbuslar

     Ushbu yo'nalishdagi xalqaro hamkorlikni amaliy mazmun bilan boyitish maqsadida O'zbekiston yetakchisi ikkita yirik loyihani ilgari surdi:

1. Turkiy davlatlarning yetakchi ilmiy markazlari ishtirokida “Turkiy dunyo ma’rifatparvarlari” xalqaro ilmiy-ensiklopedik loyihasini yaratish;

2. Jadidlik harakati namoyandalarining barcha asarlari va arxiv hujjatlarini o'zida jamlagan yagona raqamli kutubxonani shakllantirish.

Davlat rahbari so'zining yakunida xalqaro kongress turkologiya sohasidagi ilmiy hamkorlikni yangi bosqichga olib chiqishiga hamda turkiy xalqlar o‘rtasida do‘stlik va birdamlikni yanada mustahkamlashiga ishonch bildirdi.