O‘zbekiston va Buyuk Britaniya: TXIF doirasida strategik sheriklik, global sarmoyalar va innovatsion taraqqiyot

O‘zbekiston va Buyuk Britaniya: TXIF doirasida strategik sheriklik, global sarmoyalar va innovatsion taraqqiyot

TOSHKENT, 17-iyun. Yangi O‘zbekistonning investitsiyaviy salohiyati va to'laqonli ochiq, pragmatik iqtisodiy siyosati jahon sarmoya bozoridagi eng yirik "akula"larni ham mamlakatimizga jalb etmoqda. Poytaxtimizda yuksak saviyada o'tayotgan Toshkent xalqaro investitsiya forumi (TXIF) buning eng yorqin va amaliy isbotidir.

Forum dasturi doirasida Oʻzbekiston Respublikasi Prezidenti Shavkat Mirziyoyev 17-iyun kuni Buyuk Britaniyaning investitsiyalar boʻyicha davlat vaziri, lord Jayson Stokvud boshchiligidagi nufuzli va yirik delegatsiyani qabul qildi.

Global iqtisodiyot gigantlari bilan to'g'ridan-to'g'ri muloqot

Ushbu muloqotning naqadar salmoqli ekanligini unda ishtirok etgan mehmonlar tarkibidan ham bilish mumkin. Uchrashuvda Buyuk Britaniyaning “UK Export Finance”, “Standard Chartered UK”, “Sturgeon Capital”, “Endeavour Mining” hamda jahon energetika bozori yetakchisi – “British Petroleum” kabi transmilliy kompaniyalari va moliya institutlari rahbarlari shaxsan ishtirok etdilar.

Davlat rahbari olib borayotgan shaffof va o'zaro manfaatli siyosat natijasida mamlakatlarimiz o'rtasidagi hamkorlik barqaror ijobiy sur'at kasb etmoqda. Quvonarlisi, ikki tomonlama tovar ayirboshlash hajmi hamda yurtimizda Britaniya sarmoyasi ishtirokidagi korxonalar soni kun sayin jadal oʻsib bormoqda.

Toshkent xalqaro moliya markazi va innovatsion ufqlari

O'zbekiston endilikda shunchaki bozor emas, balki butun mintaqaning moliyaviy va texnologik xabiga aylanmoqda. Muzokaralarda mamlakatimizning kelajak iqtisodiyotini belgilab beruvchi mutlaqo yangi yo'nalishlar: Toshkent xalqaro moliya markazi va Xalqaro tijorat sudini rivojlantirish bo'yicha tarixiy takliflar to'liq qo'llab-quvvatlandi.

Shuningdek, delegatsiya bilan uchrashuvda kapital bozorini rivojlantirish, farmatsevtika, sunʼiy intellekt, infratuzilma, davlat-xususiy sheriklik, “yashil” energetika, transport, geologiya va neft-gaz sohalarida texnologik sheriklikni kengaytirishga kelishib olindi. Ayniqsa, ijtimoiy infratuzilmani rivojlantirish va chiqindilarni qayta ishlash boʻyicha qoʻshma ekologik loyihalarni ilgari surishga alohida eʼtibor qaratilgani Yangi O'zbekistonda xalq farovonligi har qanday iqtisodiy o'sishning bosh mezoni ekanligini yana bir bor tasdiqlaydi.